2013年12月16日星期一

曹仁超 - 窮人與富人思想上的分別

一、自我認知。
 窮人好少諗如何去賺錢及點樣才能賺到錢,好聽D係「安貧樂道」,唔好聽係「不思進取」。反之,富人天生強烈賺錢欲,會想盡一切辦法去致富。

二、休閒。
 窮人認為「食少多覺」,寧願花時間睇《大長今》,仲要加入《大長今》熱去吃韓菜。富人冇興趣睇肥皂劇,只會動腦筋《大長今》熱中賺一筆。

三、交際。
 窮人喜歡同窮人做朋友,心理上排斥有錢朋友,唔係有錢朋友睇唔起佢,而係自卑心作怪,結果只研究邊度有廉價套餐、邊間百貨公司大減價……。反之,富人交際往往研究股市點睇、匯市點睇、樓市點睇、邊處有錢搵。結果窮人只知邊度有廉價套餐邊處大減價,富人卻知道邊度有錢搵。

四、學習。
 窮人學手藝,以便一技旁身天下通行;富人學投資,懂得錢搵錢。

五、時間。
 窮人時間唔值錢,可以跑遍港九新界去買廉價貨慳番幾十蚊,但浪費一整天時間。富人閑,閑在身體,例如打高爾夫球其實係傾緊生意,腦袋冇一刻停過;窮人閑,閑在思想,忙去麻將桌上摸幾把或研究馬經。

六、金錢態度。
 窮人經濟觀係節省,勤與儉,慳得一萬就係一萬,甚至投資亦離唔開「雞生蛋」理論。例如我老曹2002年叫人買金,唔少人回答冇息收,佢地估唔到金價三年升值 50%(由二百八十美元升至四百二十美元),而斤斤計較雞會否生蛋。幾多股份雖然冇息派,但一年股價上升100%,窮人一聽到冇息派已冇晒興趣。

七、激情與感情。
 窮人只有感情,聽完新馬師曾唱《萬惡淫為首》便流淚兼捐錢,感情太豐富兼有代入感,好易受感動。反之富人卻不易受感動,例如1989年六四事件居然認為滿街鮮血係入市時機。

八、自信與自卑。
 窮人自卑,有D錢便穿名牌戴名錶名車才能增加自信,十分介意人地點睇自己。富人自信而不自卑。李實發係典型例子,藍色西裝十年如一日,戴精工表,飲自己公司屈臣氏售賣廉價紅酒……。以前郭得勝又係另一例子,永遠坐日本車,因為慳油……。呢份自信令佢地光景不佳時唔悲觀,繁榮期亦只謹慎樂觀;反之,窮人繁榮期亂花錢,衰退期呼天搶地。

九、習慣。
 有個富人見自己親戚太窮,送一隻牛畀佢。窮人滿心歡喜,但諗到牛要食草,結果將牛賣掉,買D雞養希望生蛋,結果幾天食一隻雞,一年後富人去探望佢,佢依然故我仍然係窮人一名;窮人習慣今朝有酒今朝醉。原來富人自己年輕時亦冇錢,辛辛苦苦儲錢買隻牛,然後到處帶隻牛去食草,賣奶,賺到錢便買羊生羊仔賣錢,然後開農場,最後變得富有。富人以為送隻牛畀親戚可令其發達,但唔明白窮親戚未養成儲蓄與投資習慣,每年送佢一隻牛亦無法脫貧。

十、上網。
 窮人上網搵娛樂,富人上網搵投資機會。結果窮人愈上網愈窮,富人愈上網愈富。

6 則留言:

  1. 經常提醒...益友要多多交往﹗^^~

    回覆刪除
  2. 好update的富人與窮人分別,多謝分享。

    回覆刪除
    回覆
    1. 除了六、金錢態度,其他都認同。幾多股份雖然冇息派,但一年股價上升100%,窮人一聽到冇息派已冇晒興趣。我就是這樣。

      刪除
    2. 我有另一想法. 巴郡都係冇息派的. 或許著眼於價值而不是金錢, 那會易於接受.例如我買入整幢四層唐樓, 出租四個單位只夠洗費自給自足但沒現金流, 等待它日被收購.

      刪除