科技改變旅行

以前去旅行要好早籌備，就算係三日兩夜嘅行程，都要諗成個月，如果玩長線，攪一年都唔奇。

我都鍾意去韓國、台灣、日本呢啲地方旅行。當時覺得消費唔貴，服務又好，地方大，生活壓力冇香港咁大，態度同服務都唔錯，加上當地都有地鐵，出行方便。

而家返睇，飛去呢啲地方始終要飛，機票貴、手續繁複，浪費時間。嗰邊嘅酒店亦都唔平，最麻煩係一經預訂就難以取消，行程一有變動就好慘。。。

 

而家完全唔同晒，差唔多一個星期就可北上一次，因為內地交通同高科技實在太方便。過關方式多又順暢，訂高鐵超簡單，用個APP就可以直接買飛，取消容易，最正係高鐵好少誤點，非常準時。其實只要係8個鐘頭內嘅高鐵，我覺得仲好過搭飛機，唔使提早咁耐到機場，又唔使拖住行李頻頻轉折，等拎行李，舒服得多。而家有啲晚去早到既高鉄行程，遲啲要試吓。

手機使用平靚正，例如可以收香港咭既SMS。用每月八蚊保號又可以有個大陸號碼。數據方面去鴨記買張一百蚊數據咭已經可以用20-30日(我20G計) 全國通用喎！

而家內地好多城市都有地鐵，一個APPS睇哂，出行便利。最近就特別鍾意去深圳灣南山寶安蛇口一帶，因為嗰度有小馬智行嘅無人車(我仲買咗佢啲股票，希望以后可以瞓住收)。兩年前我已經開始搭，當時仲有安全員，後來慢慢見到真正全無人駕駛，最多可以坐四個人，第一次見到真係好開心、好雀躍。其實比起有司機果啲仲安全好多。連當地人都覺得好新奇，周圍司機同路人經常望住、影相。

有次更加有趣，我喺商場門口落車，準備去小米換手機電。個保安即刻閃出嚟，話呢度唔準泊車。我同佢講呢部係小馬嘅無人車，佢當時好愕然。我走咗之後，佢仲行去車前面不斷望，搵唔到個司機，以為我洒佢，結果人擋住車，部車就停低唔敢郁，呢個保安真係可愛。

而家上大陸食住行都超方便。無論商場定街邊小食，用香港版微信或者支付寶都可以畀錢，網上落單又唔會出錯，價錢又平。又可以用手機租吓共享單車同電雞。留喺酒店24小時都可以叫外賣或日用品送到門口，打車仲正，平、快、方便，臨時改地點又得。

酒店選擇勁多勁平，以前去韓國、台灣覺得平，但同而家大陸比起來就明顯貴好多。以前搭飛機去外地，機票同酒店訂咗就好難取消；而家搭巴士、火車、高鐵上大陸，訂房取消好靈活，隨時話去就去。有陣甚至朝早上去飲餐茶，同朋友吹吹水，食埋晚飯就可以返香港，唔想返即時訂間酒店又得，百几蚊到四百蚊我都住過，方便之極。

對比起香港嘅消費、擠迫同生活節奏，上大陸短途旅行帶畀我高情緒價值。科技令旅行變得簡單又快樂，依家間唔中上去行下、玩下，已經成為我生活入面好開心嘅一部分。