我又抽水

「我揸咗的士11年，每月開足30日工，每日揸12個鐘，一個月平均儲蓄$17500，一夠錢就買匯控，唔理咩價位。世紀供股果期我手持5200股，到上個月終於買夠40000股，每個月收過萬蚊息，依家可以退休了！ 

我同阿媽住自置頹樓，一個月用幾千蚊就夠了，以後我可以做毒L，唔較鬧鐘起床，日日打機，上網，睇書，打波了，好開心！」



此文在BLOG界引起極大迴响, 眾說紛云. 我也來抽吓水, 不過我要大讚樓主的恆心!

我見好多人又話佢假，又話獨贏滙豐好傻，又話因住減派息，又話自己多錢過佢几倍都未退休等等等。其實我都多過佢，我都唔會一注獨贏，我都未退休，但咁又點呢，最重要係睇別人優點嘛，何必雞蛋挑骨頭。要讚賞別人真係好難嗎？何況而家啲后生仔，唔月月光碌爆咭已偷笑，唔好講要佢地做足三十日，日日揸十二个鐘的士冇出街娛樂唔拍拖啦！

我認為樓主說的是真話, 很簡單, 馬后炮來說, 樓主獨贏滙豐, 其實是揀錯股, 要造假也不會選它吧! (剛睇原來四萬股HSBC STATEMENT 也貼了出來, 應好快上報紙訪問)

上面的12年圖, 大家很清楚, 咁買法應該冇乜SO, 而我比樓主好運, 我的人生首注滙豐是2009年一月買的, 是當時的58元.

似乎很多人忽略了他的毅力: 「揸咗的士11年，每月開足30日工，每日揸12個鐘」, 日做夜做冇乜娛樂, 買咗三年滙豐, 一個唔該跌到得返三十几蚊, 仲要供股, 之后浮浮沉沉到今時今日都係得66蚊, 比著係你可能跳咗樓了.

而家有40000股滙豐, 即約值$2640000

如果計佢十一年前開始每月平均買17500蚊滙豐, (當)五厘複利息計(大部份時間應冇五厘, 同埋近呢几年因為利息接近一萬, 其實唔駛咁搏):

唔買滙豐齋儲又點呢? (呢十年儲定期應該都冇乜息)

少咗75萬利息

即係話佢大部份時間係用高價買了滙豐(睇返我自已買咗八年, 唔計息都只有10%增長), 其實如果佢好似我咁响2009年一月先買, 估計用八年已可財務自由. 問題係點解佢又可以十一年財務自由呢? 理由好簡單:---- 毅力, 紀律, 佢月月嘔$17500出黎買股. 就算佢唔買股齋儲, 今日馬上扐來買滙豐, 一樣月月有約 $12000 (2310000 * 0.06 /12)股息收入.

試想一個的士司机, 揸咗的士11年，每月開足30日工，每日揸12個鐘, 而家可以做返每週開三日八小時工作日常開支, 股息再加少少繼續每月投入$17500, 再過十一年係咩環境?

以一個的士司机來說, 到時他只是44歲, 但已享受做半份工11年了, 股息每月有約 $35000 (8303461 * 0.05 / 12).  

如果22年前開始, 佢一路唔儲錢唔投資做月光族, 好彩既都可以揸到八十歲卦............

似乎好多網友唔知若要做假求其扐隻出來都好過滙豐, 又唔明咩叫財務自由, 更不知紀律, 恆心及複利的威力............. 實在大多人日做夜做為別人, 卻不肯花時間處理自己的財務, 可惜!

至於揀唔揀滙豐, 應唔應該提早退休, 應該做啲乜先有意義, 呢啲係樓主應對佢人生既個人選擇, 人人不同吧!

以下係樓主的部份解答:

-------------------------

日租$440, 紅日$390, 我朝三晏三一至五共收$1400, 六日收$1000, 開工收工免交通費, 著底衫開工都得(註: 唔知共收意思係減咗日租同氣錢未?)

我唔係月供! $50-$80 應該最多貨, 供股時供咗五手

我真係用緊 Nokia, 冇 whatsapp, line, 微訊...... 連 Facebook 都係疆屍户..

19歲考到牌, 22歲開始揸, 有咩好解釋?

每月給家用$2000

我一定比給$8000家用但唔看顧阿媽的人孝順......

我不煙不酒不粗勞, 又愛做運動, 健康係必然的! 我連近視都冇....

你講得啱, 賣旗探老人院執海灘果啲我真係覺得多L魚冇L用, 我一定唔做; 但義務補習就係唯一有意義兼自己有得著的義工, 我一定會做!

股息如果貶值, 間公司就自然會加價以增加派息來留住股東架啦, 你當啲上市公司傻架咩!

幾時開始買我唔記得, 但世紀供股時就一定有5200 股在手, 而我從冇選過以股代息, 仲有在中後期股價偏低時我就已收得較多股息, 所以$70 以下持貨率應該偏多, 當然我完全冇記低過...... 

我本身係好懶的, 以前勤力其實都係為咗以後可以懶!